Фонддун Дипломатиялык Корпус менен Биринчи жолугушуусу болуп өттү

Бүгүн, 2023-жылдын 8-декабрында, Фонддун уюштуруучусу, Кыргыз Республикасынын экс-Президенти Отунбаева Роза Исаковнанын демилгеси боюнча К.Баялинов атындагы Республикалык балдар жана өспүрүмдөр китепканасында «Роза Отунбаеванын демилгеси» эл аралык коомдук фондунун жамаатынын Кыргыз Республикасында аккредиттелген Элчи айымдар, Элчилердин колуктулары менен жолугушуусу болуп өттү. Бул иш-чаранын максаты Фонддун иши жана социалдык жана билим берүү жагынан 12 жылдын ичинде топтолгон тажрыйба менен тааныштыруу, ийгиликтүү жүзөгө ашырылган программалар жана долбоорлор жөнүндө айтып берүү, ошондой эле келечекте кызматташтыктын потенциалдуу багыттарын талкуулоо болду.

Жолугушууга Кыргызстанда аккредиттелген Элчи айымдар жана дипломатиялык кызматтардын элчилеринин колуктулары, анын ичинде Кытай Эл Республикасынын Кыргыз Республикасындагы Атайын жана Ыйгарым укуктуу Элчиси Ду Дэвень айым, Европа Кеңешинин Кыргыз Республикасындагы Өкүлчүлүгүнүн башчысы Мэрилин Синтия Йозефсон айым, Германия Федеративдүү Республикасынын Кыргыз Республикасындагы Дипломатиялык миссиясынын башчысынын орун басары Константин Зеленти, Казакстан Республикасынын Кыргызстандагы Атайын жана Ыйгарым укуктуу элчисинин жубайы Жанар Жошыбаева, Улуу Британиянын Кыргыз Республикасындагы Атайын жана Ыйгарым укуктуу элчисинин жубайы Леанн Боулер айым, АКШнын КРдагы Атайын жана Ыйгарым укуктуу элчисинин жубайы Кэтрин Элизабет Вигери айым, Түрк Республикасынын КРдагы Атайын жана Ыйгарым укуктуу элчисинин жубайы Мария Доган айым, Украинанын КРдагы Атайын жана Ыйгарым укуктуу элчисинин жубайы Зоя Олийник Борисовна айым, Швейцария Республикасынын КРдагы Атайын жана Ыйгарым укуктуу элчисинин жубайы Рода Бангертер айым, Япониянын КРдагы Атайын жана Ыйгарым укуктуу элчисинин жубайы Года Юри айым, ошондой эле Түркмөнстандын КРдагы Элчилигинин атташеси Бахар Бердиева жана көп жылдар бою Фонддун аткаруучу директору болуп иштеген Кыргыз Республикасынын билим берүү жана илим министри Догдуркүл Кендирбаева катышты.

Фонддун аткаруучу директору Роза Кайыкова өзүнүн саламдашуу сөзүндө меймандарга катышып бергендиги, Фонддун ишине кызыккандыгы жана иш-чарага катышууга убакыт бөлгөндүгү үчүн ыраазычылыгын айтты, бул жолугушуу өлкөбүздө маданият жана билим берүү, жарандык коомду өнүктүрүү чөйрөлөрүндө Фонддун жана дипломатиялык корпустун ортосунда тыгыз байланыштарды түзүү үчүн мыкты аянтча болуп калат деген үмүтүн билдирди.

КР билим берүү жана илим министри Догдуркүл Кендирбаева дипломатиялык корпус менен кызматташуунун маанилүүлүгүн баса белгиледи жана билим берүү долбоорлорун колдогондугу үчүн аларга ыраазычылык билдирди.

Иш-чаранын меймандары Фонддун маданият жана билим берүү чөйрөсүндөгү кеңири иши менен таанышты. Элчилердин жубайлары мектепке чейинки билим берүүнүн стандарттарына, STEM-билим берүүгө, Фонддун басма ишине, бул тармактарда кызматташтыктын мүмкүнчүлүктөрүнө өз кызыгуусун билдирди.

«Роза Отунбаеванын демилгеси» эл аралык коомдук фонду Биринчи жолугушуу Кыргызстандын дипломатиялык корпусу менен узак мөөнөттүү жана үзүрлүү кызматташтыктын башталышы гана болуп калат деп үмүттөнөт.