Баткен облусунун Лейлек районунда "Климаттын өзгөрүүсүнөн келип чыккан конфликттерди алдын алуу" тренинги өттү
31 марта 2025 г. в 08:37
2025-жылдын март айынын аягында Баткен облусунун Лейлек районундагы Сумбула, Лейлек, Кең-Талаа жана Тогуз-Булак айыл аймактарында "Р.Отунбаеванын демилгеси" Эл аралык фондунун "Аялдар тынчтык тиреги" долбоорунун алкагында жогорку класстын окуучулары жана мугалимдери үчүн тренингдер өткөрүлдү.
Бул тренингдердин башкы максаты – климаттын өзгөрүүсүнөн келип чыккан чыр-чатактардын алдын алуу жана жаштар менен мугалимдердин экологиялык аң-сезимин жогорулатуу болду. Тренингдердин жүрүшүндө катышуучулар климаттын өзгөрүүсүнүн себептери жана анын аймактагы жашоо-шарттарына тийгизген таасири тууралуу кеңири маалымат алышты. Ошондой эле, бул өзгөрүүлөрдөн келип чыккан көйгөйлөрдү натыйжалуу чечүү, тынчтыкты сактоо жана жергиликтүү коомго ыңгайлашкан адаптациялык жолдорду иштеп чыгуу маселелери талкууланды.
Иш-чаранын жүрүшүндө катышуучулар климаттын өзгөрүүсү менен байланышкан чыр-чатактарды болтурбоо жолдорун изилдеп, реалдуу мисалдар аркылуу чечүү жолдорун талкуулашты. Жыйынтыгында ар бир айыл аймагында климаттын өзгөрүүсүнөн келип чыккан конфликттерди алдын алуу максатында маалымат кампанияларын уюштуруу, экологиялык сабактарды өткөрүү пландары түзүлдү.
Бул тренингдер "Аялдар тынчтык тиреги" долбоорунун алкагында "Өзгөрүүлөргө даяр бол!" демилгесинин иш-пландарынын негизинде ийгиликтүү ишке ашырылды.
"Аялдар – тынчтык тиреги" долбоору БУУнун Тынчтык куруу фонду тарабынан колдоого алынып, "Роза Отунбаеванын демилгеси" эл аралык коомдук фонду, БУУ Аялдар жана БУУнун Азык-түлүк жана айыл чарба уюму тарабынан ишке ашырылууда.
