«COVID-19 жана Кыргызстандын мектеп окуучуларынын санитардык-гигиеналык маданиятынын жалпы деңгээлин жогорулатуу боюнча алдын алуу чаралары» деген жаңы долбоор старт алды

2021-жылдын 7-майында Кыргызстандын мектептеринде Covid-19дун алдын алуу боюнча долбоордун алкагында долбоордун координаторлорунун, пилоттук мектептердин өкүлдөрүнүн жана ординатор врачтардын биринчи таанышуу жолугушуусу болуп өттү. Жолугушуу American Билимкана пилоттук мектебинин аймагында өттү.

Иш-чаранын башталышында «Роза Отунбаеванын демилгеси» ЭКФнын аткаруучу директору Д.Ш. Кендирбаева жана Бишкек шаарынын мэриясынын Билим берүү башкармалыгынын начальниги Э.С. Иманалиева саламдашуу менен сөз сүйлөдү жана азыркы шарттарда долбоордун маанилүү экенин белгиледи.

«COVID-19 жана Кыргызстандын мектеп окуучуларынын санитардык-гигиеналык маданиятынын жалпы деңгээлин жогорулатуу боюнча алдын алуу чаралары» долбоорунун координатору Нурзат Жээмбаева пилоттук мектептердин өкүлдөрүнө долбоордун ишке кириши жөнүндө айтып берди, ошондой эле максаттар менен милдеттерди белгиледи. Презентациянын жүрүшүндө Нурзат мектеп окуучулары үчүн материалдарды сыноодо пилоттук мектептердин ролун бөлүп көрсөттү.

Жолугушуунун алкагында врача-терапевт Эрмек Исмаиловдун презентациясы өттү, анын учурунда ал мектептерде оорулардын алдын алуунун маанилүүлүгү, ошондой эле сергек жашоо ыңгайын киргизүү жөнүндө пайдалуу маалыматтарды бөлүштү. Көрсөтмөлүү мисал катары эрмек катышуучулардын арасында кыска гимнастиканы өткөрдү.

«СММ билим берүүдө» деген корутунду презентацияны Билимкана мектебинин санариптик маркетинг башчысы Айока Абдырахманова өткөрдү. Айока билим берүү мекемелери үчүн социалдык тармактарды киргизүү тажрыйбасын, ошондой эле маркетингдин пайдалуу өбөлгөлөрүн бөлүштү.

Жолугушууга Бишкек шаарынын 6 пилоттук мектебинин өкүлдөрү катышты, Ош шаарынан катышуучулар онлайн кошулду.

«COVID-19 жана Кыргызстандын мектеп окуучуларынын санитардык-гигиеналык маданиятынын жалпы деңгээлин жогорулатуу боюнча алдын алуу чаралары» долбоору ЮНЕСКОнун штаб-квартирасынын (Париж) колдоосу менен жана ЮНЕСКОнун иштери боюнча КРнын улуттук комиссиясы жана Кыргыз Республикасынын Билим берүү жана илим министрлиги менен кызматташтыкта «Роза Отунбаеванын демилгеси» ЭКФ тарабынан ишке ашырылып жатат.

Долбоордун максаты:

Кыргызстандын мектеп окуучуларынын жана педагогдорунун арасында COVID-19 таралышынын алдын алуу чаралары менен тааныштыруу жана аларды пропагандалоо.